Campo de Abaixo

O que en Rianxo se coñece popularmente polo Campo está formado por dúas terrazas: a do Campo de Arriba e a do Campo de Abaixo, oficialmente Praza Castelao, e durante o franquismo Plaza del Generalísimo.

Esta praza constitúe hoxe en día o principal punto de referencia de ocio da vila, como lugar idóneo para gozar da celebración de festexos e espectáculos de diversa índole. Dada a súa amplitude e situación privilexiada, a Praza Castelao ou Campo de Abaixo, ao longo do tempo, foi escenario de grandes acontecementos históricos, protagonizados polos mandatarios dos grupos políticos do momento. Lémbrase un acto da Gran Diada Galeguista, que se celebrou en Rianxo o domingo 18 de setembro de 1932, con asistencia dunhas catro mil persoas.

No ano 1972 grávase o documental turístico “Mosaico de Canciones” en diferentes localizacións de Galicia, entre elas no Campo de Abaixo ou Praza Castelao, na que Andrés do Barro estaba acompañado polos grupos de músicos tradicionais Os Rosales de Asados e Os Aires da Nosa Terra de Laíño.