Casa de Somoza

Conxunto de vivenda e anexos situados no centro do lugar de Somoza, xunto a un cruce de camiños presidido pola Cruz do Rei. Finca de grandes dimensións con muro de peche de cachotaría de granito, e acceso desde a rúa principal mediante un portón alintelado de madeira, coroado por unha imaxe en pedra dunha virxe. Edificación principal de planta rectangular e dous andares con cuberta a dúas augas de tella e muros de cachotaría de granito con remates en cantaría. Fachada principal ao núcleo, fronte ao portón de acceso á finca, e edificacións auxiliares acaroadas ao muro de peche, xerando un pequeno patio. Composición sinxela das fachadas, con ocos rectangulares e accesos en planta baixa.