Fonte e lavadoiro de Carreiras

Localízanse no lugar de Carreiras, o conxunto foi construído en 1950 e restaurado entre os anos 1999 e 2000. A fonte está feita de pedra e ten dous canos, a auga cae nunha pía rectangular de 1 metro  de longo e 50 centímetros de ancho. Desde aquí a auga é canalizada cara ao “pilón” (así é como lle chaman os veciños ao lavadoiro). A pía deste mide 5 metros de longo, 2 metros de ancho e 50 centímetros de profundidade. As lousas onde se lavaba están situadas só nun dos lados longos. No ano 2018 cambiáronlle o tellado porque estaba moi deteriorado e a tella do país foi substituída polas pranchas metálicas que ten na actualidade.