Hórreo de Traxeito

Situado na finca pertencente á casa nº 52 de Traxeito, no alto do núcleo, na mesma finca que outro hórreo.

A cimentación é unha repisa de cachotaría de granito de pouca altura. Os soportes son catro cepas de pedra molduradas na parte superior. O tornarratos é unha peza corrida ao longo do corpo do hórreo. Ten tres claros con balaústres de madeira e dúas cintas, con porta de madeira no lateral leste. Non ten linteis. Columnas e cornixa de pedra. Penal dianteiro de pedra con porta de madeira e penal traseiro de pedra sen ventilación. Sobrepenas nos dous pinches, ambos de pedra. No pinche frontal é visible a inscrición coa data 1870. Cubrición de tella do país, en moi mal estado. Remates: cruz latina florenzada con botón central, sobre escocia; e pináculo piramidal sobre base cuadrangular. Orientado ao NE.

Data do ano 1870, segundo reza no frontispicio. Parece que pertencía a outro veciño que construíu este hórreo nesta finca para que estivera máis protexido.