Hórreo de Tarrío

Nunha finca con herba ao pé dunha pista asfaltada, fronte a portada de entrada ao Pazo de Tarrío.

A cimentación é unha repisa baixa de cachotaría de granito duns 30 centímetros de altura e cuberta de vexetación. Os soportes son catro cepas de pedra. O tornarratos é unha peza corrida ao longo do corpo do hórreo. Ten tres claros con balaústres de madeira e dúas cintas, a madeira en mal estado, con porta de madeira no lateral leste enmarcada por dúas columnas de pedra. Linteis de pedra con fendas horizontais, dúas en cada. Columnas e cornixa de pedra, esta moldurada e sobresaíndo un pouco os extremos tanto no penal dianteiro como no traseiro. Penal dianteiro de pedra con porta de madeira e penal traseiro de pedra con sete fendas de ventilación horizontais. Sobrepenas nos dous pinches, ambos de pedra. Cubrición de uralita con tella do país. Remates: non conserva a cruz, tan só a base cuadrangular, e pináculo piramidal estilizado sobre base cuadrangular. Orientado ao NE.

No 2010, unha veciña consultada non nos soubo concretar a antigüidade deste hórreo, mais acórdalle alí toda a vida. Por tipoloxía debe ter máis de cen anos.