Hórreo de Rial da Lagoa

Localizado nunha pequena leira situada fronte á casa á que pertence, e correspondente co solar número 25, á entrada do núcleo. Ao pé da pista asfaltada que leva ao interior do núcleo.

A cimentación é unha repisa baixa de cachotaría de granito, duns 40 centímetros de altura. Os soportes son catro cepas de pedra encintadas con cemento. O tornarratos é unha peza corrida ao longo do corpo do hórreo. Ten tres claros, con balaústres de madeira e dúas cintas, cunha porta de madeira no lateral leste. Os linteis son de pedra, con dúas fendas de ventilación horizontais cada unha. Columnas e cornixa de pedra. Penal dianteiro de pedra con porta de madeira, e penal traseiro de pedra con sete fendas de ventilación horizontais. Sobrepenas nos dous pinches, ambos de pedra. A cubrición é de tella plana. Remates: cruz latina alta cos extremos ensanchados cuadrangulares e ángulos en chafrán, sobre base cuadrangular cos ángulos cóncavos e con decoración de follas nas esquinas; e pináculo piramidal moi estilizado rematado nunha moldura cuadrangular e enriba unha bóla ovoide. Orientado ao NE.

No pinche frontal é visible, aínda que algo gastada, a inscrición “Año 1841”. No 2010, di a actual propietaria que era do seu avó, que llo deixou ao seu pai, e deste pasou a ela. Parece que o cambiaron de sitio, desprazándoo uns metros até a súa localización actual, estando orixinariamente no lateral da casa á que pertence.