Hórreo de Reboiras

Localízase entre dúas fincas privadas pechadas, moi preto da zona do Outeiro.

A cimentación é unha repisa de cachotaría de granito alta, encintada con cemento, duns 2 metros de altura. Non ten soportes. O tornarratos é unha peza corrida ao longo do corpo do hórreo, asentando directamente sobre a repisa. Ten dous claros, con balaústres de madeira e dúas cintas, con porta de madeira no lateral oeste enmarcada por dúas columnas de pedra. Columnas e cornixa de pedra. Os esquinais traseiros do hórreo son tamén de pedra, presentando, cada un, tres fendas de ventilación horizontais abucinadas. Penal dianteiro de pedra con porta de madeira, co van rematado en arco, e penal traseiro tamén de pedra cun só orificio de ventilación, no pinche e dentro dun motivo decorativo de círculo en relevo co interior convexo. Sobrepenas nos dous pinches, ambos de pedra. Cubrición de tella do país. Remates: cruz latina alta florenzada con botón central, e talo rematado en bóla e sobre base cuadrangular. Orientado ao NE.

No 2010,  un dos seus propietarios di que é moi antigo, de máis de cen anos, aínda que non sabe exactamente cal é a súa antigüidade.