Cruceiro da Fonte do Coto

No cruce de dúas rúas, ao lado da escola.

Cruceiro de granito sobre unha grande pedra que na súa fronte ten un cano de auga ao xeito de fonte. Non ten pedestal. O varal é de sección cadrada en inicio e final, e octogonal ou de arestas matadas no resto. O capitel é sinxelo, cuadrangular moldurado en dous bloques. A cruz é florenzada con botón central, con chafráns nas esquinas. No anverso da cruz ten un Cristo crucificado coa cabeza volteada á dereita, cartela con INRI, tres cravos e pano de pureza anoado á dereita. No reverso da cruz ten unha Virxe sobre peaña cun anxo, coas mans cruzadas sobre o peito.

No 2010, un veciño conta que foi construído hai uns 30 ou 40 anos, cun diñeiro veciñal. O cruceiro foi feito na Picaraña (Padrón). Na rocha que serve de baseamento meteron un cano para facer unha fonte coa auga que baixa do monte.