Cruz da Chan da Viña

Na praza coñecida como Chan de Viña, en Bexo de Abaixo.

Cruz localizada no muro de peche dunha propiedade. Carece de baseamento, pedestal e de capitel, consistindo nunha grande cruz de brazos desiguais. O varal é de sección cuadrangular, ao igual que a cruz. Na cara frontal presenta varios debuxos gravados na pedra: unha escada que ascende polo varal até chegar ao punto central da cruz, onde se ven dous círculos concéntricos. Nos extremos dos brazos da cruz é visible un triángulo coa base aberta e orientada ao centro da cruz.

Ten máis de 100 anos (de finais do século XIX-principios do XX). Os veciños paraban diante desta cruz nos enterros para rezar un Nosopai. A continuación, de camiño á igrexa parroquial, paraban na Cruz da Capela, no Cruceiro das Escuras, no Cruceiro de Ignacio, e aínda había outro cruceiro no que paraban, o de Sabela, hoxe desaparecido