Cruceiro da Estación

Localizado no pequeno adro da Capela de San Xosé Obreiro. Trátase dun cruceiro do tipo de crucifixo, con tres chanzos e unha base ben labrada, con gorxa profunda serven de apoio a unha vara cuadrangular nos extremos, mais octogonal na súa maior parte. Capitel de catro lados curvos con flor no centro de cada un afastadas por espirais. Cruz cilíndrica, biselada nos extremos e con vultos. Por diante amosa un Cristo de tres cravos, baixo carteleira de INRI, cos brazos en ángulo, as mans pechadas, o nó do pano á súa banda dereita e o pé dereito por riba do esquerdo. Por detrás, sobre ménsula circular, hai unha imaxe da Virxe do Carme.

Na parte dianteira da base unha placa de mármore incrustada na mesma lese: “RECUERDO DE D. JOSÉ Mª BUELA FIGUEIRA Y SU ESPOSA Dª CARMEN PÉREZ GÓMEZ / OESTE"-CATOIRA 1960".