Capela da Virxe da Saúde

Erguida sobre un antigo castro a 173 metros de altura, trátase dunha ermida de planta rectangular e nave única. Muros de cachotaría reforzada con perpiaño rematados en pináculos nos puntos débiles, como son esquinas e zócalos. Fachada con portada de arco apuntado, óculo trebolado, espadana central de dobre van e pilastras laterais que enmarcan a fachada. No adro e campo da festa emprázase un cruceiro de ánimas e un palco de música reconvertido en local social, e no interior da capela pódese observar unha imaxe de San Campio de gran valor histórico-artístico e un retablo realizado por Xosé Ferreiro.

Na súa contorna tivo lugar a Batalla de Casal de Eirigo contra os franceses en 1809, motivo polo cal se construíu esta ermida, aínda que xa existía unha antiga capela anterior á batalla.