Cruceiro de Vilariños

Cruceiro de granito situado á beira da estrada principal de Pastoriza, da tipoloxía de capeliña.

Plataforma feita con perpiaños graníticos. A continuación un chanzo de sección cadrada. O groso varal, de sección cadrada coas arestas rebaixadas, posúe unha inscrición moi erosionada na que aínda se pode ler o ano da súa feitura: “1636”. Onde acaban os rebaixes superiores ten esculpidas dúas caras nos dous dianteiros e dúas cunchas de vieira nos traseiros. O capitel ten catro lados, un deles decorado cun anxo coas ás abertas. O conxunto remata nunha capela con fornela cadrada e tellado plano e cuberta a catro augas con cruz pétrea de remate. As paredes da capela son do ano 1993 (ano da súa reconstrución) e aparecen decoradas con botóns. A cruz de remate posúe as imaxes de Cristo crucificado no anverso, e a Virxe das Dores sobre unha peaña no reverso.