Capela de San Xoán Bautista de Vista Real

Capela reedificada en 1625 sobre outra xa existente, situada no interior dunha finca de grandes dimensións ao sur de Iñobre. En orixe pertenceu ao conxunto do Pazo dos Caamaño ou Pazo de Vista Real.

Construción de planta rectangular, cunhas dimensións exteriores de 6,35 metros de ancho por 8,75 metros de longo. Formada por un único corpo con bóveda de canón e cuberta de tella a dúas augas. Fachada sinxela de portada alintelada e espadana dun só arco coroada por unha cruz sen imaxes.

Aparece documentada, por vez primeira, no ano 1580 (“entre as viñas de Iñobre; en lamentable estado de conservación”), mais foi reedificada pola dona do pazo, Margarita de Mendoza y Sotomayor, entre os anos 1625 e 1645. Na súa frontal loce os escudos dos Sotomayor, Caamaño e Mendoza.