Casa reitoral de San Salvador de Taragoña

Casa reitoral do século XIX situada na contorna da Igrexa de San Salvador de Taragoña e do cemiterio parroquial, no centro do núcleo da Igrexa. Acceso principal desde o camiño que vai á igrexa mediante un portón de grandes dimensións e lintel formado por doelas de granito.

Construción de planta trapezoidal e dous andares realizada con muros de cachotaría e cantaría de granito, e cuberta a dúas e tres augas de tella. Fachada principal con galería pechada no extremo oeste e frontón con pináculos superiores de remate no extremo leste. As carpinterías orixinais de madeira foron substituídas por unhas de aluminio.