Petróglifo Nº 16 dos Campos

Grupo de gravados que se espallan por unha extensa zona das parroquias de Santa María de Leiro e Santa Comba de Rianxo, entre A Pedreira e A Devesa de Rianxiño, estendéndose cara ao noroeste até o curuto do Alto do Corniño. Os gravados máis salientables son:

- Un grupo de gravados non prehistóricos, probablemente feitos polos canteiros que traballaban aquela zona, e nos que se pode ler, entre outras marcas, o topónimo "Rianjo", o que fai pensar que poida ser unha marca da delimitación da parroquia.

- Escena de loita entre dous cabalos (ou cervos en período de caída da cornamenta).

- Unha posible escena de caza na que varios animais parecen fuxir en manda na mesma dirección, mentres outro queda atrás ferido e outros parecen mortos sobre o camiño.

- Outro enorme cervo de características moi similares aos grandes anteriores.

- Posible femia preñada.

- Cervo macho en actitude de bradar.

- Animal con aspecto de felino.

- Na rocha máis setentrional deste conxunto, unha colección de cuadrúpedes, outro felino e outro antropomorfo moi similar ao do Petróglifo Nº 1 do Mouchos.

Este petróglifo gravouse sobre unha laxe semisoterrada baixo a capa vexetal, situada a 27 metros ao noroeste da laxe 1 do Alto do Corniño (GA15072026). Ten unhas dimensións de 2,90 x 1,20 metros nos eixos N-S e L-O, respectivamente. Presenta catro coviñas, dúas delas de grande tamaño. A situada ao leste posúe 11 centímetros de diámetro e a situada ao oeste 10 centímetros. As dúas menores son de 3,5 centímetros, a localizada ao leste, e de 2 centímetros a situada ao oeste.