Reloxo de sol de Lestrobe

Localizado nun hórreo da Eira de Lestrobe deste núcleo, na parte alta da aldea, situado no ángulo SE da Eira.

Fermoso reloxo de sol situado no pinche traseiro dun hórreo da Eira dos Hórreos de Lestrobe. Trátase dun reloxo de granito, exento, de forma circular, con molduración no contorno e rematado na parte superior en dous pequenos semicírculos ós lados e un talo no centro. Asenta sobre unha base cuadrangular alta, cuxa cara frontal pode verse un motivo decorativo floral en baixo relevo inscrito nun círculo escavado na pedra. Ouros motivo decorativo floral, este máis pequeno pero tamén en baixo relevo inscrito nun círculo escavado na pedra, é visible na parte superior do propio reloxo, na confluencia dos remates semicirculares e o talo. Conserva o gnomon ou estilo, sendo este unha barra ríxida. Trátese dun cuadrante vertical ortomeridiano. Orientado ao sur.

Podería situarse a finais do século XIX, século no que parece que este tipo de construcións tiveron máis auxe. Único exemplar localizado en Lestrobe.