Hórreo de Tarrío

Situado na mesma finca que outro hórreo, no núcleo da aldea.

Exemplar de gran tamaño de hórreo mixto. A cimentación é unha repisa alta de perpiaños encintada con cemento, de algo máis de 1 metro de altura. Non ten soportes, asentando o tornarratos directamente nela. O tornarratos é unha peza corrida ao longo do corpo do hórreo. Ten catro claros con balaústres de madeira e dúas cintas, a madeira en mal estado, con dúas portas de madeira, unha en cada lateral, no segundo claro empezando polo norte. Non ten linteis. Columnas e cornixa de pedra. Os dous penais son de pedra, un, o oriental, con oito fendas de ventilación horizontais e o occidental sen ventilación. Sobrepenas nos dous pinches, ambos de pedra. Cubrición de tella do país, en mal estado. Remates: dous pináculos piramidais estilizados sobre unha base cuadrangular. Orientado ao E-W.

No 2010, unha veciña di que debía ser antigo, de máis de cen anos.