Hórreo de Paizal

Sobre o muro de peche dunha finca privada, ao pé da estrada que, desde Rialiño, vai cara Paizal e Traxeito. Pertence a unha casa de pedra tradicional.

Cimentado sobre o muro de peche da finca, de cachotaría de granito. Os soportes son tres cepas de pedra coa metade superior, onde aparecen molduradas, refeitas en cemento. Tornarratos corrido ao longo de todo o corpo do hórreo. Ten dous claros, con balaústres de madeira e dúas cintas, cunha porta de madeira no lateral leste. Columnas e cornixa de pedra. Penal da fronte de pedra con porta de madeira e penal traseiro tamén de pedra sen fendas de ventilación. Ten sobrepenas nos dous pinches, ambos de pedra. Cubrición de tella do país. Só conserva un remate, un bico ou pináculo piramidal na parte traseira. Orientado ao NW.

No 2010, segundo o home da actual propietaria e dos veciños, parece que sería un hórreo moi antigo, se callar máis de 200 anos.