Hórreo de Eiró

Nunha  pequena finca pechada con enreixados e cemento, encaixado entre unha casa e un alpendre de cemento e ladrillo.

A cimentación é unha repisa de cachotaría de granito duns 1,50 metros de altura aproximadamente, encintado con cemento. Os soportes son catro cepas de pedra, cos gabinetes pechados con madeira no lateral leste. O tornarratos é unha peza corrida ao longo do corpo do hórreo. Ten tres claros, con balaústres de madeira e dúas cintas, con porta de madeira enmarcada por dúas columnas de pedra no lateral leste. Non ten linteis. Columnas e cornixa de pedra. Os dous penais son iguais, de pedra con sete fendas de ventilación horizontais. Sobrepenas nos dous pinches, ambos de pedra. Cubrición de tella do país. Remates: cruz latina alta bilobulada nos extremos, de sección cuadrangular e pedestal cilíndrico sobre base cuadrangular; e pináculo piramidal moi estilizado con decoración triangular na base. Orientado ao NE-SW.

No 2010, os veciños non souberon concretar a antigüidade deste hórreo, aínda que pensan que pode ser antigo, que o lembran aí toda a vida.