Cruceiro do Naval

Nun cruce de camiños entre o rural e o núcleo de Teaio.

Cruceiro de granito. Mide 3,50 metros de alto por 2,50 de ancho. O baseamento son tres gradas cuadrangulares. O pedestal é cuadrangular rematado en chafráns, con paramentos recadrados. O varal é un fuste de sección cadrada en inicio, onde é visible un rebaixe en cada paramento de forma cuadrangular rematado en semicírculo, e octogonal no resto. O capitel non presenta capitel; a unión entre o fuste e a cruz realízase mediante un anelo metálico. A cruz é de sección octogonal, con remates florenzados con botón central. No anverso da cruz ten unha Virxe orando sobre peaña dun anxo con ás. No reverso hai unha imaxe erosionada.

Segundo a ficha do Inventario de Patrimonio, tería máis de 100 anos. Parece que neste punto existía antigamente unha capela, a de San Martiño, actualmente desaparecida. O cortexo fúnebre parábase ao pasar para rezar unha oración polo defunto.