Cruceiro da Igrexa de San Xoán de Laíño

Situado no adro da igrexa parroquial, nun lateral da mesma.

Feito de granito e cemento. Mide 4,50 metros de alto por 2,05 de ancho. O baseamento é de cemento, sobre tres grades cuadrangulares, a primeira delas semisoterrada. O pedestal é de cemento, cúbico, remata con chafráns, paramentos recadrados. O varal é un fuste de cemento, estilizado de sección cadrada en inicio e octogonal no resto. O capitel é de granito, cuadrangular, con astrágalo cuadrangular liso, ábaco con lados curvos e vértices chafranados, volutas, follas de acacia e querubíns. A cruz é de sección circular, leñosa con nós e brazos desiguais. No anverso da cruz ten un Cristo crucificado con tres cravos, inclinando a cabeza cara o ombro esquerdo, coas mans pechadas. Con coroa de espiñas, pano de pureza anoado á dereita, INRI (pergamiño). No reverso da cruz hai unha Virxe co neno coroada e sobre peaña dun querubín.

Ten máis de 100 anos a cruz e o capitel, mentres que o fuste, a basa e a plataforma son máis recentes, froito dunha restauración. Este cruceiro non é o orixinal, polo menos a cruz, posto que foi cambiado en tempos polo Cruceiro de Ignacio en Bexo.