Pombal do Outeiriño

Pombal de planta circular, situado no lugar do Outeiriño, cun diámetro interior de 2,55 metros, unha altura até a cornixa de 3,55 metros e uns muros cun grosor de 80 centímetros.

Este pombal pertencía aos terreos dos Moure (familia con moitos terreos), aínda que agora é do banco. Sitúase illado de edificacións, nun lugar alto, con terreo seco, orientado ao mediodía (imprescindible para as pombas), abrigado dos ventos dominantes e non ten árbores arredor para impedir o asentamento de aves rapina.

Descoñecese o ano de construción, así como o canteiro. Deixouse de empregar a finais dos anos 70. A súa forma é de volumetría cilíndrica e carece de tellado, mais dedúcese que era de cuberta cónica con tella e rematada nunha peza de pedra que sobresae o asoleirado, plataforma onde van os chamados buratos para a entrada e saída das pombas.