Lagoa de Pedras Miúdas

Pedras Miúdas ten a súa orixe nunha antiga canteira no monte da que se extraía pedra. Cando a canteira quedou abandonada, a acumulación das choivas creou esta lagoa artificial, que ten unha profundidade de até 30 metros. A empresa propietaria da canteira pretendía converter o lugar nun vertedoiro, mais ante a presión veciñal levouse a cabo un proxecto para transformar o lugar nun espazo naturalizado.

A zona foi declarada como Espazo Natural de Interese Local no ano 2008 pola Xunta de Galicia. Ten un volume de 105.000 metros cúbicos de auga e está rexistrada como humidal no Inventario de humidais de Galicia.

Na contorna que hoxe ocupa este espazo, localizábanse as Barreiras de Catoira, formadas por numerosos lugares de extracción de barro.