Igrexa de Santa Baia de Oeste

A súa construción remóntase ao século XVI, aínda que nada se conserva dese período. Templo con planta de cruz latina. Cuberta con bóveda de canón. Capela con sarcófago do século XVI. Na súa fachada, executada a finais do século XIX, destaca unha porta estilo neogótico con arco oxival igual que os das fiestras superiores e no medio un fermoso campanario octogonal de fasquía ascensional, cuberto con cupuliña. Sobre a entrada principal atópase unha orixinal fornela en forma de saeta coa imaxe da patroa e na parte superior o oco dun reloxo. Os laterais con pequenos contrafortes para poder soster a bóveda.

Ao norte e leste do templo, localízase o cemiterio parroquial, formado por enterramento en terra e nichos labrados en granito de distinto valor patrimonial.