Casa de Maquieira

Vivenda unifamiliar de planta rectangular, dúas alturas e cuberta a dúas augas, que se localiza xusto detrás da igrexa parroquial de Dimo. Construída en cantaría de baixa calidade, que só atopa como excepción a contorna dos ocos e os eixos estruturais do inmoble. A fachada aparece organizada por medio de portas e portasdaire balconadas, cunha forxa excelente, equidistantes propias da arquitectura vilega.

O muro principal do andar superior acolle un brasón cuartelado en cruz sobre unha cartela granítica na que se lee: “ANO DE 1898 / D. JUAN F. GARCIA / PRESBITERO / DIMO / 28”. A casa posúe un xardín pechado na súa fronte que posúe un enreixado de fundición, apoiado sobre columnas e muro de grande beleza. O portalón de acceso ao cuberto, unha das arquitecturas adxectivas da vivenda, presenta unha moldura barroca acobadada.