San Xoán Vello de Bamio

Preto do Aghuadeliño, nun lugar chamado O Monte do Ceo, estaba o San Xoán Vello. Esta igrexa non é coñecida nos libros nin figura en ningún catálogo oficial do Concello de Vilagarcía de Arousa. Nin os máis vellos lembran o edificio en pé, mais algúns saben que nese lugar estaban as ruínas e os terreos que aínda conservan ese nome. A lenda conta que a aquel templo vello primeiro caéralle o teito, e logo estragáranse as paredes, e así foi como o santo quedara espido e sen abeiro. Por iso montárono nun carro tirado por un par de bois xunguidos que comezaron a camiñar libremente pola aba do monte en dirección a Bamio. E cando chegaron ao San Xoán, pararon, non se sabe porqué nin porque non. E onde o carro parou, ergueuse a actual capela.