Pedra do Encanto

A Pedra do Encanto ou Gran Laxe de Meadelo é o nome dunha rocha enchida de petróglifos no Salgueiral, localizada a uns 120 metros da Torre do Meadelo. Recollida na historiografía erudita desde principios de século, por autores como Hugo Obermaier ou Fermín Bouza Brey, nunca foi totalmente esquecida. A cantidade de lendas fixadas na memoria oral alusivas a esta pedra, falan da importancia desta pedra, paisaxe mítica do lugar:

Do Monte Lobeira á Pedra do Encanto,

hai unha mina de sete reinados,

sete de ouro, sete de prata,

sete de veleno que mata.

Xa a comezos de século XX, cando a construción da estrada a Catoira, a pedra foi partida, a pesares do interese dalgúns estudosos da época. E así segue máis de cen anos despois, partida ao carón da estrada.