Mercado dos Mouros

Asentamento romano ribeirán no río Ulla. O lugar ocupa uns 11.500 metros cadrados, ten forma ovalada e está sobreelevado do terreo circundante, que hoxe en día é un terreo intermareal. Nas primeiras escavacións levadas a cabo polo arqueólogo David Fernández Abella, consistentes nunha simple investigación superficial, apareceron fragmentos de cerámica e tellas de época romana datados entre os séculos II a.C. e V d.C. Nunha das sondaxes tamén se localizou un posible almacén e noutra unha traza en negativo dunha cabana. A cerámica de almacenamento é coherente coa a atopada noutros asentamentos costeiros galegos, como Halltern 70, Campaniensis, Dressel I e posteriores. Sería coetáneo de lugares arqueolóxicos existentes en Galicia coma o da Lanzada.

Nas intervencións arqueolóxicas do ano 2016, os arqueólogos desenterraron máis de 5.000 pezas de interese. Entre eles hai elementos de bronce coma un colar, cerámica decorada, ánforas e ferros. Afirman que moitos deles son de importación púnica, o que confirmaría o carácter comercial do poboado. Con estas últimas investigacións, o asentamento vería incrementada a súa antigüidade tres séculos antes do pensado.