Sede do Partido Galeguista de Asados

A casa de Ramón Sende, situada na Praza de Manuel Antonio, foi o berce do galeguismo en Asados, pois era a sede do Partido Galeguista. En 1936, o partido tiña en Rianxo 264 afiliados, a agrupación máis numerosa de Galicia. Na parroquia de Asados eran 150 militantes, 27 deles mulleres: labregas, costureiras, pescas, mestras...

O 24 de setembro de 2022, a Comisión pola Recuperación da Memoria Histórica do Barbanza e o Concello de Rianxo homenaxearon ás 27 mulleres do Partido Galeguista de Asados. Recuperouse a memoria dos tempos da República nas voces de Xesús Santos e de Aurora Marco, estudosa do papel das mulleres no movemento galeguista. Recitáronse poemas, un por cada un dos nomes de todas as militantes, acompañados de rosas.