Casa de San Xosé

Edificación que data do ano 1660 situada xunto á Capela de San Xosé da Floresta, ao oeste de Rianxiño, e que actualmente está destinada a aloxamento de turismo rural.

Conxunto de planta en L composto por unha edificación principal e varias edificacións auxiliares acaroadas ao muro de peche da finca. Edificación principal de planta rectangular e dous volumes; un de dous andares, e cuberta a dúas augas; e outro de tres, con cuberta a catro augas. Todo o conxunto está resolto con muros de cachotaría con remates en cantaría. Fachada principal ao oeste, de composición simétrica e con grandes ventás balconeiras no segundo andar do corpo de menor altura. Fachada posterior de características similares.