Casa de Arcos Moldes

Nada queda da casa da rúa do Hospital, a poucos metros da graneira de Mariano Rodríguez, onde residiu o “mestre sen escola”, Xosé Arcos Moldes, compadre de Castelao. Este foi lugar de múltiples xuntanzas da mocidade ilustrada e mariñeira do Rianxo de comezos do século XX, ás que asistía o propio Castelao cando estaba na vila. Durante unha desas reunións, en xullo de 1910, Ramón Rey Baltar funda o semanario de combate contra o caciquismo El Barbero Municipal, que durou até marzo de 1914. Na cabeceira figuraba Arcos Moldes como director da publicación, Alfonso R. Castelao como director gráfico e administrativo e Germán Rañó Alcalde como redactor.