Petróglifo Nº 7 dos Campos

Grupo de gravados que se espallan por unha extensa zona das parroquias de Santa María de Leiro e Santa Comba de Rianxo, entre A Pedreira e A Devesa de Rianxiño, estendéndose cara ao noroeste até o curuto do Alto do Corniño. Os gravados máis salientables son:

- Un grupo de gravados non prehistóricos, probablemente feitos polos canteiros que traballaban aquela zona, e nos que se pode ler, entre outras marcas, o topónimo "Rianjo", o que fai pensar que poida ser unha marca da delimitación da parroquia.

- Escena de loita entre dous cabalos (ou cervos en período de caída da cornamenta).

- Unha posible escena de caza na que varios animais parecen fuxir en manda na mesma dirección, mentres outro queda atrás ferido e outros parecen mortos sobre o camiño.

- Outro enorme cervo de características moi similares aos grandes anteriores.

- Posible femia preñada.

- Cervo macho en actitude de bradar.

- Animal con aspecto de felino.

- Na rocha máis setentrional deste conxunto, unha colección de cuadrúpedes, outro felino e outro antropomorfo moi similar ao do Petróglifo Nº 1 do Mouchos.

Este conxunto está formado por catro laxes con gravados, a última das cales está na actualidade completamente cuberta de vexetación.

- Laxe 1: atópase moi alterada pola extracción de pedra. mide 6,90 metros (NL-SO) e 4,05 metros (NO-SL). Na parte norte apréciase un gran ovalo (2,80x1,80 metros) que contén diferentes motivos, entre os que destacan un gran puñal de antenas e unha grande cornamenta de cérvido. Noutras zonas da laxe vense cinco zoomorfos.

- Laxe 2: mide 2,50 metros (N-S) e 1,70 metros (L-O). O motivo consiste nun cuadrúpede de 30 centímetros.

- Laxe 3: mide 1,75 metros (N-S) e 1,70 metros (L-O). Apréciase un motivo consistente nun zoomorfo de 20 centímetros.