Petróglifo Nº 5 dos Campos

Grupo de gravados que se espallan por unha extensa zona das parroquias de Santa María de Leiro e Santa Comba de Rianxo, entre A Pedreira e A Devesa de Rianxiño, estendéndose cara ao noroeste até o curuto do Alto do Corniño. Os gravados máis salientables son:

- Un grupo de gravados non prehistóricos, probablemente feitos polos canteiros que traballaban aquela zona, e nos que se pode ler, entre outras marcas, o topónimo "Rianjo", o que fai pensar que poida ser unha marca da delimitación da parroquia.

- Escena de loita entre dous cabalos (ou cervos en período de caída da cornamenta).

- Unha posible escena de caza na que varios animais parecen fuxir en manda na mesma dirección, mentres outro queda atrás ferido e outros parecen mortos sobre o camiño.

- Outro enorme cervo de características moi similares aos grandes anteriores.

- Posible femia preñada.

- Cervo macho en actitude de bradar.

- Animal con aspecto de felino.

- Na rocha máis setentrional deste conxunto, unha colección de cuadrúpedes, outro felino e outro antropomorfo moi similar ao do Petróglifo Nº 1 do Mouchos.

Este conxunto está formado por tres laxes con gravados rupestres, aínda que só atopamos dúas.

- Laxe 1: localízase 5 metros ao leste do valado que atravesa todo o Alto do Corniño e que está orientada cara ao sur. Mide 7,15 metros (N-S) e 1,20 metros (L-O). Está moi afectada pola erosión natural e pola extracción de pedra. O motivo está na parte central da rocha e consiste en dous zoomorfos que miran cara ao leste e miden un 30 centímetros.

- Laxe 2: está moi erosionada pola acción dos axentes naturais e do lume. Os gravados case non se aprecian, tan só se observan trazos identificables.

- Laxe 3: estaría situada 10 metros ao sur do valado e a 20 metros da laxe 2. Os gravados consistirían en dous cruciformes.