Petróglifo Nº 10 do Monte Pelotiña

Os petróglifos do Monte Pelotiña están formados por oito conxuntos situados moi preto da Autovía do Barbanza. Os motivos son principalmente, círculos, zigzag e cazoletas, sen que haxa evidencias de figuracións humanas ou animais.

Este petróglifo está insculpido sobre un batolito de granito, con orientación oeste e dominio visual preferente sobre a desembocadura do Ulla e a rasa litoral. O soporte ten unhas dimensións no eixo N-S de 7,30 m e no eixo L-O de 4. Os motivos aparecen compostos por un círculo de 18 centímetros de radio con coviña central de 5 centímetros de diámetro. A 10 centímetros deste motivo presenta unha coviña de 2 centímetros, e a 1 metro orientación norte, un grupo de 3 coviñas de 3 centímetros de diámetro.