Petróglifo Nº 2 dos Campos

Grupo de gravados que se espallan por unha extensa zona das parroquias de Santa María de Leiro e Santa Comba de Rianxo, entre A Pedreira e A Devesa de Rianxiño, estendéndose cara ao noroeste até o curuto do Alto do Corniño. Os gravados máis salientables son:

- Un grupo de gravados non prehistóricos, probablemente feitos polos canteiros que traballaban aquela zona, e nos que se pode ler, entre outras marcas, o topónimo "Rianjo", o que fai pensar que poida ser unha marca da delimitación da parroquia.

- Escena de loita entre dous cabalos (ou cervos en período de caída da cornamenta).

- Unha posible escena de caza na que varios animais parecen fuxir en manda na mesma dirección, mentres outro queda atrás ferido e outros parecen mortos sobre o camiño.

- Outro enorme cervo de características moi similares aos grandes anteriores.

- Posible femia preñada.

- Cervo macho en actitude de bradar.

- Animal con aspecto de felino.

- Na rocha máis setentrional deste conxunto, unha colección de cuadrúpedes, outro felino e outro antropomorfo moi similar ao do Petróglifo Nº 1 do Mouchos.

Este conxunto está formado por catro laxes con gravados das que unha está cuberta de vexetación.

- Laxe 1: mide 9,30 metros (N-S) e 5,40 metros (L-O). O motivo consiste en dous zoomorfos unidos pola cabeza e erguidos polos cuartos traseiros.

- Laxe 2: mide 3,60 metros (N-S) e 1 metro (L-O) e o gravado está formado por 4 círculos concéntricos con 3 coviñas no interior do central. Da parte leste do círculo parten tres liñas radiais. Ao sueste deste motivo obsérvase outro, moi erosionado, e un dobre círculo con coviñas centrais. Ao leste do círculo apréciase un cuadrúpede tamén moi erosionado.

- Laxe 3: mide 6,40 metros (N-S) e 3,20 metros (L-O) e o motivo consiste nunha coviña (15 centímetros de diámetros) atravesada por un suco sinxelo. Xunto a ela, outras coviñas máis pequenas. Ao lado deste gravado vese unha composición circular incompleta (35 centímetros de diámetro) con coviña central.