Casa dos da Riva

Edificio de planta rectangular con dous andares, de estilo barroco. A fachada do Cantón da Igrexa está realizada en boas pezas de cantaría. Vese subliñada polo abondoso número de vans que a animan, cun total de cinco xanelas rectangulares no primeiro andar, e de tres portas e dúas xanelas cuadrangulares no andar baixo, dispostas de xeito simétrico. No primeiro andar, cara á dereita, sitúase un fermoso escudo dos da Riva, onde se pode ollar a familia Salgado no primeiro cuartel, os Reino no terceiro ou as faixas dos Parga no cuarto cuartel, entre outras familias. Na fachada que dá á rúa Castelao, os muros son de cachotaría rebocada, tamén con abondoso número de vans. Nas xanelas-balcóns, tanto dunha rúa como a outra, ten uns peitorís de ferro coado.