Hórreo de Eiró

Nas aforas do núcleo, nunha finca privada situada na zona alta da aldea, preto da casa á que pertence, actualmente abandonada.

A cimentación é unha repisa alta de cachotaría de granito encintada con cemento. Non ten soportes, asentando directamente o tornarratos na repisa. O tornarratos é unha peza corrida ao longo do corpo do hórreo. Ten tres claros, non conservando ningún o peche de madeira, quedando á vista tan só o esqueleto de pedra. Columnas de pedra, non conservando a cornixa nin a cubrición. Os dous penais son de pedra, tendo o do extremo norte fendas de ventilación horizontais e o do sur non. Sobrepenas nos dous pinches, ambos de pedra. É visible un arco de madeira encaixado nas columnas sobre o que descansaría a armazón da cubrición. Remates: cruz latina alta cos ángulos en chafrán e sobre base cuadrangular e pináculo piramidal de gran tamaño. Orientado ao NE-SW.

No 2010, os veciños din que ten moita antigüidade, máis de cen anos.