Cruceiro do Outeriño

Cruceiro do tipo de crucifixo, que presenta por alicerce catro chanzos irregulares e unha base cúbica sobre a que se finca unha vara primeiramente cuadrangular, mais despois octogonal, que se cobre un capitel de catro lados curvos con cabeciñas nas partes medias afastadas por espirais. Serve de apoio a unha cruz cilíndrica con vultos que simulan os nós da madeira, amosando figuras por ambas caras. Así, por diante, vemos un Cristo baixo carteleira do INRI, coas mans semiabertas, nó do pano a súa dereita e pé dereito por riba do esquerdo. Por detrás figura da Virxe María de pé, sobre pousadoiro de cabeza de anxo. Amosa as mans cruzadas sobre o peito e cóbrese por enteiro por un mantelo. O cruceiro presenta por detrás unha mesa de pedra.