Fonte e lavadoiro do Busto

Fonte dun único cano que se insire nunha das caras dun cubo de cantaría coroado por un edículo de perfil e feitura tradicional. De sinxelo deseño, a auga do manancial condúcese por unha pequena canle a un lavadoiro granítico de planta rectangular que permite fregar roupa por dous dos seus lados por medio de pedras inclinadas situadas a 0,50 metros de altura. O conxunto sitúase por baixo do nivel do chan, de aí que para acceder a el haxa de descender por unha escalinata de granito. O conxunto aparece protexido por un muro de contención labrado en cachotaría que protexe todo o seu perímetro.