Lavadoiro da Fonte Santa

Lavadoiro localizado no espazo natural da Granxa, de planta rectangular con catro fiadas de follas de pedra para lavar e unha plataforma que o rodea onde se asenta un banco corrido. Está protexido por muros de contención para delimitar o recinto e aínda se poden ver os piares que sostiñan o tellado.

A súa denominación, Fonte Santa, fai referencia ás propiedades positivas que a tradición local lle atribúe ás súas augas, ao menos até a construción e apertura da gasolineira que, segundo contan os propios veciños, afectou á súa calidade. Foi un espazo de reunión para a xente do mar e forma parte do antigo camiño de pesca que conectaba a fábrica de Crespo Rivas e Varela co lavadoiro.