Palco da música de Xanza

Situado no campo da festa, compartindo espazo co Cruceiro Nº 2 do Campo e a Escola de Xanza. De base rectangular, todo o palco estaba construído en ladrillo, enfuscado e pintado coas cores branca e marrón. Por un dos laterais accedíase á base inferior, que era utilizada como almacén. Foi construído polos veciños da parroquia e aquí era onde actuaban as orquestras o día 15 de agosto durante as festas na honra da Nosa Señora de Xanza, aínda que desde fai anos xa non ten uso.

Investigadores do CSIC Galicia e do Instituto de Ciencias del Patrimonio-Incipit estiveron en Xanza no mes de outubro de 2023 realizando o obradoiro Proxecto Palcos no que se presentaron as bases dun proxecto de investigación que pretendía localizar, catalogar e documentar os palcos da música construídos en Galicia a partir da década dos 70, así como recoller as historias, memorias e relatos que circulan ao redor deles. Malia isto, catro meses despois, este palco da música foi derrubado polo Concello de Valga, perdéndose unha parte da historia e do patrimonio local de Valga.