Escola de Ponte Valga

Ademais de escolas infantís, esta edificación albergou durante moitos anos a Casa do Concello de Valga. Na actualidade ten un uso administrativo.

As escolas unitarias eran as existentes no rural galego hai varias décadas, mostra da vida propia das parroquias, que entón eran as máis importantes social e administrativamente. As parroquias foron, pouco a pouco, sendo desposadas da súa organización e estrutura, cando os mestres deixaron de vivir na mesma parroquia, os curas escasearon, e as escolas pasaron a ser grupos escolares xeralmente na capitalidade do concello para optimizar os recursos e estruturar a formación dos alumnos.

Mantivéronse determinadas escolas unitarias, ben para educación preescolar, ben porque a entidade do núcleo permitía ou esixía esa individualidade, mais foron desaparecendo pola diminución da matrícula ao reducirse a poboación. En Valga manteñen a actividade educativa as escolas unitarias de Ferreirós, Xanza, Campaña, Chenlo, Forno e Vilarello. A Escola de Ponte Valga perdeu dita actividade fai anos.