Hórreo do pai de Castelao

No 1919, era alcalde de Rianxo Manuel Pérez (baixo as ordes do cacique Manuel Viturro, secretario da Comisión Provincial). Ese ano, o pai de Castelao, Mariano Rodríguez, construíu, sen solicitar autorización municipal, a graneira que aínda se conserva neste lugar, na Fincheira.

Viturro, liberal e inimigo acérrimo do pai de Castelao (de tendencia conservadora e que fora alcalde) non perdeu a ocasión de pór toda a carne no espeto para que esta graneira fose derribada. Cando os canteiros contratados para o seu derribo procederon a levalo a cabo, atopáronse coa oposición de boa parte das mulleres da vila, que se botaron á rúa para evitalo.

O hórreo está situado acaroado ao muro de peche dunha parcela con fronte á rúa Fincheira, preto do cruce da rúa Roxelio Pérez. Cámara rectangular de cantaría de granito apoiada sobre muretes transversais e tornarratos perimetral. Cuberta a dúas augas de lousas e sobrepenas de granito, coroadas por lampións nos vértices e pináculos de diferentes formas nos laterais.