Hórreo da Marquesa

No lugar da Marquesa atópase un fermoso exemplar do século XIX. Aséntase sobre soleira maciza de cachotaría con rachas e escaleira de acceso. Sopórtase sobre catro cepas prismáticas torneadas na parte superior. O tornarratos é corrido. A cámara, de tres claros, péchase nos penais e extremos dos costais con pezas horizontais de cantaría con regandixas. Os tramos de madeira resólvense con balaústres verticais de madeira con dúas faixas (travesas). Presenta unha fermosa cornixa moldurada e voada. As sobrepenas son quebradas e xeométricas, con perfís moi marcados, ó igual cós pináculos, con bolas e fortemente xeometrizados. Os pinches decóranse tamén con círculos e placas recortadas que lembran ao barroco galego.