Hórreo da casa reitoral de Santa Baia do Araño

O hórreo do Araño foi construído a finais do século XVIII, entre 1784 e 1805, sedo o crego Rafael López quen o mandou construír. Está localizado nos terreos da casa reitoral de Santa Baia do Araño, é o hórreo máis longo de toda Galicia (36'75 metros a cámara e 37'05 o celeiro), e o de máis capacidade se sumamos as capacidades da cámara (109'31 m3) e o celeiro (59'09 m3). Atópase a carón da Igrexa de Santa Baia do Araño e simboliza o inmenso poder que debeu de ter a igrexa na comarca no século XVII.

A base está conformada polo celeiro de cachotaría con rachas, e leva apegadas as escaleiras de acceso. O tornarratos é corrido, prolongación do chan da cámara, de cantaría. A cámara péchase con perpiaños horizontais en ringleira e non se marcan as columnas. Leva sopena baixo o beiril, e as sobrepenas rematan en cruces flanqueadas por pináculos de bolas.