Punta do Salto do Ladrón

Parte saínte sobre o río Ulla que parece unha illa, aínda que na baixamar vese que está unida á costa.

Unha das posibles orixes do topónimo, aínda que non a máis probable, vén de cando transportaban en barco aos presos políticos cara ao campo de concentración de Rianxo, situado nas instalacións da antiga fábrica de salgadura dos Goday. Nunha noite de néboa, un dos barco achegouse moito á terra e un preso saltou á auga, subiu á pedra que forma a parte máis saínte desta punta e escapou polo monte. Os gardas, que adoitaban chamarlle “ladróns” aos presos, comezaron a berrar “ao ladrón! ao ladrón!”. E foi así como se lle comezou a denominar Punta do Salto do Ladrón.