Praia de Tanxil

Esta praia é a máis visitada de Rianxo na actualidade, cunha lonxitude duns 370 metros, separada da Praia de Quenxo polo Dique de Baltar.

Tanxil configúrase como un espazo que aínda garda a forma e o sabor de principios de século, até non fai moito presidido pola Virxe de Guadalupe de Asorey. Foi inspiración de numerosos autores rianxeiros como Castelao e Rafael Dieste. Tanxil é un espazo máxico, que alentou historias de aparicións como as do “porviso” e a do “urco”. Figuras fantasmagóricas que utiliza Rafael Dieste na súa peza teatral “A fiestra valdeira”, e recollidas da boca da xente.