Cruceiro do Funcheiro

Cruceiro de granito situado na marxe norte da rúa da Fincheira, da tipoloxía de crucifixo.

Plataforma feita a base de perpiaño granítico irregular. A continuación dous chanzos de sección cadrada e arestas chafranadas, o primeiro deles moldurado. A base, de sección octogonal, presenta relevos decorativos moi erosionados que semellan símbolos da Paixón. O varal nace cunha sección cadrada moldurada para seguir en sección octogonal. O capitel é unha peza cadrada feita en formigón. O conxunto remata nunha cruz tipo latina na que aparecen as imaxes de Cristo crucificado no anverso, e a Virxe coas mans entrelazadas e sobre unha peaña no reverso.