Casa dos Xens

Conxunto de varias edificacións situadas sobre o camiño que une os lugares das Miráns e Os Xens. Parcela rectangular delimitada por un muro de cachotaría con acceso mediante portón alintelado coroado por unha cruz sen imaxes. No interior existen varias edificacións de recente construción dedicadas a vivenda. A edificación orixinal, situada no extremo norte da finca, foi rehabilitada recentemente, conservando o volume orixinal, realizada con muros de cachotaría con detalles en cantaría, e cuberta a dúas augas de tella. Consta de dous andares, con acceso ao andar baixo desde o interior da finca. Destacan os balcóns sobre canzorros en ambas fachadas, con varandas de ferro e pilastras de granito, substituíndo ás orixinais.