Mámoa do Monte de Dorna

Túmulo de reducidas dimensións que está parcialmente arrasado debido á construción da Autovía do Barbanza que o cortou pola metade.

Mide no seu eixo L-O 16,50 metros e no N-S 14,70. Ten unha altura de 1,50 metros. Presenta un burato de violación central de 5,80 metros (N-S) e de 5,10 (L-O), cunha profundidade de 0,40 metros. Do cono de violación sobresaen algunhas laxes que poderían ser chantos da cámara e na superficie tumular obsérvanse numerosas pedras de pequeno tamaño que semellan formar parte da coiraza de cubrición.

En 1993, os traballos de construción da vía rápida sacaron á luz esta mámoa no Monte de Dorna, feito este que fixo modificar o trazado da estrada. Non foi até o 2009 cando a mámoa foi recuperada por un equipo de arqueólogos que limpou o túmulo, escavou unha parte e habilitou un muro de contención para evitar o desprendemento das pedras.